Nær 2/3 aðspurðra eru sammála ákvörðun þeirri sjávarútvegsráðherra að ekki gefa út kvóta til hvalveiða

Samkvæmt skoðanakönnun Capacent Gallup fyrir Náttúruverndarsamtök Íslands og International Fund for Animal Welfare (IFAW), gerð í fyrri hluta október, segjast 66,3% aðspurðra sammála þeirri ákvörðun Einars K. Guðfinnssonar, sjávarútvegsráðherra að ekki gefa út kvóta til hvalveiða fyrr en markaðsaðstæður fyrir hvalkjöt hafa batnað. 22,6% aðspurðra lýstu sig ósammála ákvörðun sjávarútvegsráðherra og 11,1% tóku ekki afstöðu.

Spurt var: Nýlega lýsti sjávarútvegsráðherra því yfir opinberlega að nýir kvótar til hvalveiða yrðu ekki gefnir út fyrr en aðstæður á markaði hefðu batnað. Ertu sammála eða ósammála þesari ákvörðun sjávarútvegsráðherra? Niðurstöður Capacent Gallups eru til marks um að mikill meirihluti almennings telur að markaður fyrir hvalkjöt sé ekki fyrir hendi og því tilgangslaust að halda áfram hvalveiðum.

Sú staðreynd að einungis 7 hrefnur voru veiddar af 30 til veiða í atvinnuskyni talar sínu máli. Veiðarnar borga sig ekki. Hvalaskoðun er margfalt hagkvæmari fyrir þjóðarbúið en hvalveiðar eru. Í ár fóru yfir 100 þúsund ferðamenn í hvalaskoðun og ætla má að tekjurnar hafi numið 1,5 milljarði króna.

Niðurstöður Capacent Gallup eru í samræmi við fyrri kannanir á vægi hvalveiða fyrir íslenskan efnahag.
Birt:
Oct. 30, 2007
Tilvitnun:
Náttúruverndarsamtök Íslands „2/3 sammála hvalveiðistoppi“, Náttúran.is: Oct. 30, 2007 URL: http://natturan.is/d/2007/10/29/23-sammla-hvalveiistoppi/ [Skoðað:Nov. 21, 2019]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
skrifað: Oct. 29, 2007
breytt: Oct. 30, 2007

Messages: