Næsta fræðsluerindi HÍN verður haldið mánudaginn 26. mars 2012 í stofu 132 í Öskju, húsi náttúrufræðinga við Háskóla Íslands, og hefst erindið kl. 17:15.

Það er Björn Pálsson, sagnfræðingur og fyrrum héraðsskjalavörður Árnesinga, sem flytur erindi sem hann nefnir Sigurður Þórarinsson jarðfræðingur: Minningabrot.

Ágrip af erindi Björns Pálssonar sagnfræðings, haldið mánudaginn 26. mars 2012.

„Í erindinu verða nefnd dæmi um rannsóknir íslenskra jökla á fyrri hluta 20. aldar, þætti Sigurðar þar í og þeim ferðamáta sem þar var viðhafður allt frá mannsfótum til vélsleða og snjóbíla. Þá verður fjallað lítilega um aðra íslenska jarðfræðinga svo sem Tómas Tryggvason og Guðmund Kjartansson, sem hófu jarðfræðinám á svipuðum tíma og Sigurður. Sigurð má nefna fyrsta íslenska menntaða jöklafræðinginn en einnig kom hann að jarðskjálfta- og fornleifarannsóknum á námsárum sínum. Frægastur varð hann þó á sviði eldfjallafræði og þá einkum fyrir gjóskulagatímatalið (Tefrokronologiska studier på Island) sem var efni doktorsritgerðar hans. Þar varð Sigurður brautryðjandi á heimsvísu. Meginhluti erindisins fjallar þó um kennslu hans í jarð- og landfræði við Háskóla Íslands árin 1968-1970, sem þá voru nýjar við HÍ, og þá ekki síst vettvangsferðir á vori svo sem að Heklugosinu 1970. Þá verður einnig reynt að bregða ljósi á náttúruverdarmanninn Sigurð Þórarinsson og áherslu hans á þau málefni bæði heima og á heimsvísu. Í ljósi aðstæðna þeirra mála nú mun Sigurður hafa verið þar öðrum framsýnni. Stuðst verður við myndefni, gamalt og nýtt.“

Björn Pálsson (f.1942) hóf nám í sagnfræði með landa-og jarðfræði sem hliðargreinar við HÍ haustið 1968 og lauk þar BA-prófi í sagnfræði. Á námsárunum kenndi hann þessar þrjár greinar bæði við MR og MH. Síðan vann hann við kennslu og bankastörf til ársins 1990. Þá varð hann héraðsskjalavörður Árnesinga og sinnti því verkefni að mestu til starfloka 2009.

Ljósmynd: Björn Pálsson leiðsegir hópi fólks um Reykjadal, ljósm. Guðrún A. Tryggvadóttir.

Birt:
March 20, 2012
Höfundur:
Björn Pálsson
Tilvitnun:
Björn Pálsson „Hið íslenska náttúrufræðingafélag - fræðsluerindi um Sigurð Þórarinsson“, Náttúran.is: March 20, 2012 URL: http://natturan.is/d/2012/03/19/hid-islenska-natturufraedingafelag-fraedsluerindi-/ [Skoðað:Sept. 20, 2021]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
skrifað: March 19, 2012
breytt: March 20, 2012

Messages: