Vegna gríðarlegar eftirspurnar ætlar ljúfmetisverslunin Búrið að bjóða bændum, framleiðendum og neytendum oftar upp á að útvega sér gómsæta gæðafæðu beint frá býli. Næsti markaður er fyrstu helgina í mars og munu ljúfir tónar ljúfmetis fylla jarðhæð Hörpu og bjóða bragðlaukum viðstaddra upp í seiðandi dans.

Matarmarkaðir Búrsins eru stærstu matarmarkaðir hér á landi. Óhætt er að segja að jólamarkaðuinn sem haldin var í desember hafi farið langt fram úr björtustu vonum aðstandenda og er talið að um sextán þúsund matgæðingar hafi lagt leið sína í Hörpu þá helgi.

Næsti markaður verður helgina 1.-2. mars og að venju verða fjölmargir framleiðendur á staðnum að kynna og selja framleiðslu sína beint. Meðal þess sem verður á boðstólum til að gleðja munn og maga er mjólk, grafið ærfille, nauta-, lamba- og hrossakjöt, vistvænt kjöt af hamingjusömum svínum , brjóstsykur, bollur, allskonar te úr íslenskri náttúru, sölt af öllum gerðum og litum, sultur, brauð, pestó, grænmetispylsur, kaffi, hummus, reyktur laukur, hrökkkex, súkkulaði, repjuolía, reyktur makríll, heitreykt hrogn, pylsur, salami, humarsúpa og soð, kartöflukonfekt og ýmiskonar ljúffeng saft verður boðið til smakks og kaups svo eitthvað sé nefnt.

Einkunarorð markaðarins eru uppruni, umhyggja og upplifun.

Birt:
Feb. 24, 2014
Tilvitnun:
Búrið - The Icelandic Pantry „Matarmarkaður í Hörpu 1. - 2. mars“, Náttúran.is: Feb. 24, 2014 URL: http://natturan.is/d/2014/02/24/matarmarkadur-i-horpu-dagana/ [Skoðað:Oct. 20, 2019]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Messages: