Eldgosið í Holuhrauni heldur áfram og þó að öskufall sé ekki farið að hafa áhrif þá vitum við ekkert hvernig málin þróast og því gott að ryfja upp hvernig við getum undirbúið okkur komi til öskufalls á einhverjum tímapunkti. Eftirfarandi upplýsingar fengust frá Umhverfisstofnun í apríl 2010 er eldgosiði í Eyjafjallajökli gekk yfir og gilda enn.

Fínasti hluti gjóskunnar flokkast sem svifryk. Það er minna en 10 míkron. Svifryk á greiða leið niður í lungu og getur haft óæskileg áhrif á heilsu.

Áberandi öskufall:

Þar sem er sýnilegt öskufall er fólki ráðlagt að vera ekki á ferli að óþörfu. Ef fólk fer út er ráðlagt að hafa grímu eða blautan klút fyrir vitjum. Börn og þeir sem eru með öndunarfærasjúkdóma skulu halda sig innandyra. Ráðlagt að nota hlífðargleraugu. Loka gluggum og hækka í ofnum til að draga úr því að ryk smjúgi inn. Hugsanlega þarf að þétta glugga.

Ekki áberandi öskufall – mistur:

Fínni hluti gjóskunnar er ekki síður varasamur fyrir öndunarfærin en sjálft öskufallið og getur borist víða. Gott er að hafa blautan klút eða rykgrímu, einkum fyrir börn og þá sem eru með viðkvæm öndurfæri.

Sóttvarnarlæknir hefur veitt eftirfarandi upplýsingar um einkenni  vegna svifryks:


Einkenni í öndunarfærum:

  • Nefrennsli og erting í nefi
  • Særindi í hálsi og hósti
  • Fólk sem þjáist af lungnasjúkdómum, til dæmis astma, getur fengið berkjubólgur sem varar í marga daga og lýsa sér í hósta, uppgangi og öndunarerfiðleikum

Einkenni í augum:

  • Gosaska getur ert augu einkum ef augnlinsur eru notaðar
  • Tilfinning um aðskotahlut
  • Augnsærindi, kláði, blóðhlaupin augu
  • Útferð og tárarennsli
  • Skrámur á sjónhimnu
  • Bráð augnbólga, ljósfælni
Birt:
Sept. 2, 2014
Uppruni:
Umhverfisstofnun
Tilvitnun:
Guðrún Arndís Tryggvadóttir „Leiðbeiningar vegna gjóskufalls“, Náttúran.is: Sept. 2, 2014 URL: http://natturan.is/d/2014/09/02/leidbeiningar-vegna-gjoskufalls/ [Skoðað:Oct. 23, 2019]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Messages: