Náttúran.is

Opið hús hjá Garðyrkjuskólanum Reykjum

Verið velkomin í Garðyrkjuskólann Reykjum í Ölfusi (við Hveragerði) á sumardaginn fyrsta þ. 25. apríl nk. frá kl. 10:00-18:00

Nú eru ríflega 50 nemendur við nám á garðyrkjubrautum LbhÍ að Reykjum, á fjórum brautum, blómaskreytingum, garð- og skógarplöntuframleiðslu, skrúðgarðyrkju og ylrækt. Hefð er fyrir því að bjóða vorið velkomið með hátíðardagskrá á sumardaginn fyrsta.

Á markaðstorgi verður til sölu grænmeti, blóm, grænmet s.s. brakandi ferskt hnúðkál, kryddjurtir o.fl. Kaffi og veitingar til sölu á kaffistofunni. Hægt að heimsækja hitabeltið í bananahúsinu og pottaplöntusafnið. Afhending Garðyrkjuverðlaunanna 2013 og andlitsmálning og leikir fyrir börnin.

Ljósmynd: Vorboðinn, Guðrún A. Tryggvadóttir.

Rit um grunnþætti menntunar - Sjálfbærni

Fyrir tveimur árum staðfesti mennta- og menningarmálaráðneytið nýjar aðalnámskrár fyrir leik-, grunn og framhaldsskóla. Á heimasíðu ráðuneytisins segir að í aðalnámskrám,„birtist ný menntastefna sem hefur það meginmarkmið að rækta með markvissum hætti þá þekkingu, leikni og viðhorf sem styrkir getu einstaklinga í framtíðinni til að verða gagnrýnir, virkir og hæfir þátttakendur í jafnréttis- og lýðræðissamfélagi.

Kjarni menntastefnunnar er settur saman úr sex grunnþáttum: læsi, sjálfbærni, lýðræði, jafnrétti, heilbrigði og velferð og sköpun.“

Í framhaldi af þessari stefnumörkun hóf ráðuneytið og Námsgagnastofnun að gefa út lítil þemahefti um hvern af þessum grunnþáttum. Þau eru bæði gefin út á netinu og prentuð. Heftin eru fyrst og fremst ætluð kennurum og öðru skólafólki til að skerpa þekkingu sína á viðkomandi grunnþætti aðalnámskrár og fá hugmyndir um innleiðingu og kennslu á viðkomandi sviði.

Heftið um sjálfbærni er fjórða heftið af þessum sex sem nú kemur út og er enn aðeins á netinu en kemur út prentað á næstu dögum. Það er skrifað af Sigrúnu Helgadóttur, kennara og umhverfisfræðingi. Þótt það sé fyrst og fremst ætlað skólafólki nýtist það hverjum sem er sem langar til að kynna sér hugmyndafræði menntunar til sjálfbærni.

Mynd: Bókarkápa Sjálfbærniritsins, skoða bókina sem flettibók á vef Námsgagnastofnunar.

Guðni Elísson hlýtur umhverfisverðlaun Grænna daga

Í hádeginu í gær, 18. mars voru Grænir dagar formlega settir á Háskólatorgi en Grænir dagar eru fimm daga dagskrá þar sem umhverfismál eru sett í forgrunn í þeim tilgangi að styrkja umhverfisvitund innan sem utan Háskólans. Sjá dagskrána hér.

Gaia, félag meistaranema í Umhverfis- og auðlindafræði sem skipuleggur Græna daga, veitti í annað sinn Umhverfisverðlaun Grænna daga en þau eru veitt einstaklingi, hópi eða deild innan Háskóla Íslands, sem hefur með einhverjum hætti stuðlað að aukinni umhverfisvitund innan háskólans og í íslensku samfélagi. Árið 2012 hlaut Verkfræði- og náttúruvísindasvið verðlaunin fyrir innleiðingu sorpflokkunarstöðva innan háskólans.

Í ár var það Guðni Elísson, prófessor við Hugvísindadeild háskólans sem hlaut verðlaunin. Guðni hefur á undanförnum árum skrifað mikið um umhverfismál, fjallað um loftslagsbreytingar jarðar og hvernig stjórnmálaumræða hér á landi vanrækir og hunsar þær breytingar sem eru yfirvofandi, ekki bara í lífríki náttúrunnar heldur einnig í samfélagi okkar mannanna og á sviði alþjóðamála. Guðni hefur einnig bent á það hvernig stjórnmálaöfl hafa ítrekað gert lítið úr niðurstöðum vísindalegra rannsókna á sviði umhverfismála og ýtt til hliðar varnaðarorðum fræðimanna um umhverfisáhrif framkvæmda og gjörða mannfólksins.

Í niðurstöðu dómnefndar, sem ákveður hver hlýtur verðlaunin ár hvert, segir að skrif Guðna Elíssonar séu mikilvæg í baráttunni fyrir bættri umhverfisvitund og þeim markmiðum sem þjóðir setja sér til að nálgast sjálfbæra þróun og tryggja jafnan rétt komandi kynslóða. Loftlagsbreytingar eru breytingar sem munu hafa víðtæk áhrif bæði hér á landi sem og annars staðar í heiminum og mikilvægt að stjórnmálaflokkar, hvar sem þeir eru staðsettir í hinu pólitíska litrófi, viðurkenni alvarleika þeirra áhrifa sem loftlagsbreytingar valda og bregðast við af alvöru, því ekkert sé áunnið ef fyrirheit um viðbrögð eru einungis orðin tóm. Framlag Guðna til umhverfisvitundar er því að mati dómnefndar nauðsynlegur hlekkur í fræðslu til almennings um umhverfismál og ákveðið aðhald við þau stjórnvöld sem fara með ákvörðunarvald á viðbrögðum í umhverfismálum, málum sem varða okkur öll.

Ljósmynd: Davíð Fjölnir Ármannsson afhendir Guðna Elíssyni umhverfisviðurkenningu Gaia.

Lífræn matjurtarækt á íslandi, þróun hennar og staða

„Lífræn matjurtarækt á íslandi, þróun hennar og staða“ er yfirsögn MS varnar Rögnu Dagbjartar Davíðsdóttur nema í Umhverfis og auðlindafræði við Háskóla Íslands en vörnin fer fram á morgun, miðvikudaginn 23. janúar kl 15:00 í VRII, Hjarðarhaga 6, stofu 157.

„Þrátt fyrir að stjórnvöld hafi samþykkt tillögu þess efnis að auka lífræna landbúnaðarframleiðslu þannig að hún verði um 15% af landbúnaðarframleiðslu á Íslandi árið 2020 (Þingskjal 1020, 2011-2012),  er ekki vitað hvert hlutfall hennar er í dag, hvorki hlutfall lífrænnar matjurtaræktar né hlutfall annarra lífrænna landbúnaðarvara. Markmið þessarar rannsóknar var kanna stöðu lífrænnar matjurtaræktar á Íslandi, fjalla um þróun hennar í náinni framtíð og áætla hlutdeild helstu matjurta af heildar matjurtauppskeru landsins. Í rannsókninni kom meðal annars í ljós að nú er lífræn grænmetisuppskera tæp 4% af heildarframleiðslu hérlendis og er búist við að hún aukist lítið næstu árin. Lífræn bygguppskera eykst hinsvegar úr 52% í tæp 69% af byggi ræktuðu til manneldis á tímabilinu. Auk þess var rekstrarumhverfi bænda í lífrænni matjurtarækt skoðað en bændur segjast almennt ekki anna eftirspurn og hún sé enn að aukast. Bændur sinna að mestu leyti öllu ferlinu frá ræktun þar til varan er komin í verslanir. Lögð var áhersla að fá þeirra sjónarmið varðandi hvað hindraði bændur í að fara í lífræna matjurtaræktun og hvað þyrfti að leggja áherslu á til að auka hana. Bændur telja að helsta hindrunin sé skortur á hvatningu frá þeim stofnunum er standa greininni næst eins og frá Landbúnaðarháskóla Íslands, Bændasamtökum Íslands og stjórnvöldum. Til að auka lífræna matjurtarækt þurfi meðal annars að auka styrki, ráðgjöf, tilraunir og kynningu. Í rannsókninni er aðallega stuðst við könnun sem gerð var á meðal bænda í lífrænni matjurtarækt og tilraunir er varða matjurtir á Íslandi. Auk þess var aflað heimilda hjá ýmsum stofnunum og einstaklingum er tengjast málaflokknum.“
Leiðbeinendur eru þau Brynhildur Davíðsdóttir og Ólafur Dýrmundsson. Prófdómari: Kristín Vala Ragnarsdóttir.

Allir eru velkomnir!

Ljósmynd: Kartöflugrös, hvítkál og bygg, lífræn eigin ræktun, Guðrún A. Tryggvadóttir.

Jólabasar í Lækjarbotnum

Waldorfleikskólinn Ylur og Waldorfskólinn í Lækjarbotnum halda sinn árlega jólabasar laugardaginn 17. nóvember frá kl. 12:00 -17:00.
Margir fallegir hlutir verða í boði bæði í umhverfi og stemmningu sem hverjum og einum er hollt að upplifa, m.a. brúðuleikhús, barnakaffihús, veiðitjörn, eldbakaðar pizzur, jurta apótek, tónlist á vegum nemenda, tívolí og munir þar sem hugur mætir sköpunarkrafti handanna.

Dagskrá:

Kaffi og kökur, handverk, jurta apótek kl. 12:00 - 17:00
Brúðuleikhús kl. 13:00 og 15:00
Eldbakaðar pizzur og tónlist kl. 12:00 - 15:00

• Veiðitjörn er í höndum 1. -  2.bekkjar en þar veiða börn pakka úr hafinu.
• 3.-4. bekkur sjá um barnakaffihús en þar fá fullorðnir einungis að versla í fylgd með börnum.
• 5.-6. bekkur er með tívolí.
• 7.-8. bekkur er með happdrætti.
• 9.-10. bekkur matreiðir eldbakaðar pizzur í Skemmunni.
• Menningaratriði nemenda eru í Skemmunni
• Brúðuleikhús er í höndum kennara skólans en þar er blandað saman brúðum, sögustund og tónlist.
• Börn og foreldrar allra bekkja skólans og leikskólans hafa unnið handverk og búið til jurta apótek.

Sjá staðsetningu Waldorfskólans í Lækjarbotnum hér á Græna kortinu.

Um Waldorfuppeldis- og kennslufræði: