Náttúran.is

Skemmtigildi náttúrunnar

Það liggur fyrir að maðurinn nýtur náttúrunnar sér til heilsubótar þótt hann hafi ekki af henni neinn beinan hagrænan ávinning. Fallegir skýjabólstrar, fálki sem flýgur yfir, hljóðið í hrossagauknum, falleg grös. Allt er þetta til að gleðja andann og létta mönnum lund.

Því miður eru sumir sem líta á náttúruna sem stað þar sem þeir eigi að sýna hvað þeir séu sterkir og geta mikið. Þannig aka sumir á jeppum utan vega eða spæna upp göngustíga á vélhjólum. Slík umgengni við náttúruna lýsir sorglegri skammsýni og ákveðinni firringu þess manns sem er algjörlega mótaður af stórborgarumhverfi.

Ljósmynd: Loðvíðisbrum, Guðrún A. Tryggvadóttir.

Gakktu í bæinn á Menningarnótt 2012

Má bjóða þér að ganga í bæinn á Menningarnótt? Kíkja í vöfflur í Þingholtunum, læra tangó á Hótel Borg, fara á tónleika í Hörpu, þiggja heimboð í Ráðhúsinu, dansa salsa á Lækjartorgi, fá faðmlag á Laugaveginum, fara í menningargöngu um Skólavörðuholtið, taka þátt í götu- og garðveislum eða litlum listahátíðum sem leynast víðsvegar í miðborginni? Kynntu þér dagskrána hér á síðunni og fylgstu með því nýir viðburðir bætast við dagskrána á hverjum degi!

Menningarnótt verður haldin í sautjánda sinn þann 18. ágúst næstkomandi. Menningarnótt er hátíð sem allir borgarbúar skapa og upplifa saman, úti á torgum og götum miðborgarinnar, í bakgörðum eða söfnum, fyrirtækjum og ekki síst í húsunum í bænum.

Allt um Menningarnótt er að finna á menningarnott.is.

Allla menningarstaði í Reykjavík er að finna hér á Græna Íslandskortinu.

Röggvarfeldurinn, flík og ábreiða, í fortíð og nútíð.

Þriðjudaginn 27. mars mun Hildur Hákonardóttir halda fyrirlestur um Röggvarfeldinn í hádegiserindi í Þjóðminjasafni Íslands. Fyrirlesturinn er hluti af fyrirlestraröðinni „Fræðslufyrirlestrar Þjóðminjasafns Íslands“. Hildur mun í fyrirlestri sínum fjalla um röggvarfeldinn sem var í senn flík og ábreiða. Hún rekur upphaf feldarins, blómatíð og afdrif, en hann er ein af grunngerðum fatnaðar og því lífseigur og má enn finna  afleiddar gerðir hans í nokkrum löndum. Fyrirlesturinn hefst kl. 12:05. Aðgangur er ókeypis og allir velkomnir.

Hildur Hákonardóttir lærði myndvefnað við Myndlista- og handíðaskólann  og í Listaskóla Edinborgar. Hún stundaði listvefnað og kennslu á árunum 1969 til 1980 við  Handíðaskólann og var skólastjóri hans á árunum 1975-1978 og stofnaði þá hina umdeildu Nýlistadeild og einnig málaradeild.

Árið 1980 flutti hún austur í Ölfus og var forstöðumaður Byggða- og listasafns Árnesinga um áratuga skeið. Bifreiðaslys olli því að hún sneri sér að ritstörfum og hefur hún gefið út bækur um sjálfsþurft og garðyrkju  - Ætigarðinn og Blálandsdrottninguna - og einnig bók um kvennafrídaginn árið 1975 með eigin myndskreytingum.

Hildur hefur á síðustu árum  látið gamlan draum rætast, að kynna sér  kljásteinavefstaðinn forna og vefa röggvarfeld með hjálp innlendra og erlendra vefara.  Áhugi á  kljásteinavefstaðnum hefur  aukist í mörgum löndum undanfarið samfara því að konur hafa snúið sér í auknum mæli að rannsóknum á fornum vefnaði.

Fjöldi greina eftir Hildi birtast reglulega hér á vefnum. Smelltu hér til að sjá 177 greinar eftir HIldi hér á vefnum.

Ljósmynd: Hildur Hákonardóttir með röggvarfeld um sig.

Stofan - Myndlist

Myndlist er mikilvæg á hverju heimili ekki síður en tónlist og bækur. Hvort sem um verk virtra listamanna eða teikningu eftir börnin er að ræða, gildir að frágangur, upphenging og samspil við það sem fyrir er í rýminu gerir gæfumuninn. Það góða við „góða myndlist“ er að hún er vönduð, fer ekki úr tísku og er því ákaflega umhverfisvæn.

Um eftirprentanir og tískuskraut gildir það aftur á móti að líftíminn er stuttur vegna lélegra gæða og aðeins spurning um hvenær skrautið endar á haugunum. Ef þú þarft að kaupa skraut og skipta um myndir reglulega hafðu þá í huga að þau séu úr efnum sem hafa ekki skaðlega áhrif um aldur og ævi eftir að þú hefur losað þig við þá.

Völuspá matarleikhús - heimsfrumsýning í Norræna húsinu

Völuspá - A Nordic Food Experience er samstarfsverkefni leikhússins Republique í Kaupmannahöfn, Norræna hússins og DILL veitingastaðar og byggist bæði á ævafornum textum Völuspár og norrænni matarmenningu. Sýningin er ferðalag um heima skilningarvitanna þar sem mæri hefðbundinnar leiksýningar og máltíðar eru könnuð og þeim ögrað. Um er að ræða einstaka sýningu þar sem öll skilningarvitin spila saman, sjón, heyrn og tilfinning og svo auðvitað bragð og ilman, í nýrri og einstakri túlkun á spádómi völvunnar. Sýningin er sett upp sem ferðalag um fagra byggingu Alvars Aaltos og nánasta umhverfi hennar, hvert rými fyrir sig táknar hluta textans og réttir sýningarinnar draga þá merkingu sérstaklega fram. Maturinn í sýningunni er skipulagður af danska matreiðslumeistaranum Mette Sia Martinussen, sem hefur m.a. slegið í gegn með Madeleines Madteater í Kaupmannahöfn, og matreiðslumeistara Dill, Gunnari Karli Gíslasyni.

Að verkinu standa:

Hugmynd og sjónrænt efni: Dorte Holbek, Mette Sia Martinussen, Alette Scavenius, Martin Tulinius
Leikstjóri: Martin Tulinius
Hönnun sviðsmyndar: Dorte Holbek
Matreiðslumenn: Mette Sia Martinussen, Gunnar Karl Gíslason
Leikritahöfundur: Alette Scavenius

Verkið verður flutt dagana 23. október til 2. nóvember 2011 og er einkum ætlað fullorðnum. 24 áhorfendur geta að hámarki tekið þátt í hverri sýningu. Verkið Völuspá - A Nordic Food-Expedition er hugsað sem sýning í algjörum sérflokki, bæði hvað varðar mat og drykk og skurðpunkt máltíðar og leikhúss.

Miðar eru seldir á www.midi.is