Náttúran.is

Samtök grænmetisæta stofnuð

Samtök grænmetisæta á Íslandi voru stofnuð laugardaginn 4. maí í sal Lifandi markaðar Borgartúni.

Um 70 manns sátu fundinn þar sem gengið var frá samþykktum félagsins, stjórn kosin og starfshópar myndaðir. Samþykkt var að tilgangur samtakanna yrði að stuðla að jákvæðri ímynd og fjölgun grænmetisæta, standa vörð um hagmuni þeirra og vinna að því að fjölga valkostum nauðsynja- og neysluvara án dýraafurða. Einnig var kynnt merki samtakanna sem hannað var af Ragnari Frey.

Tilgangi sínum hyggjast samtökin ná með eftirfarandi hætti:

• Standa fyrir fjölbreyttum viðburðum fyrir grænmetisætur, áhugamenn og velunnara, og stuðla að auknum tengslum og kynnum grænmetisæta.
• Standa fyrir virkri fræðslu og upplýsingagjöf til grænmetisæta og annarra með uppbyggingu vefsíðu, opnum viðburðum, útgáfu fræðsluefnis, fyrirlestrum, kynningu í fjölmiðlum, í skólum, á vinnustöðum o.fl.
• Gefa út hnitmiðað fræðsluefni fyrir matvælaframleiðendur, veitingastaði, matreiðslumenn o.fl. um þjónustu við grænmetisætur, og koma því markvisst á framfæri.
• Stunda virka hagsmunagæslu og aðhald t.d. með hvatningu eða jafnvel þrýstingi á framleiðendur, innflytjendur og verslanir, með fyrirspurnum og greinargerðum til hins opinbera, með álitsgjöf varðandi lagafrumvörp og reglugerðir, með fréttatilkynningum til fjölmiðla um brýn hagsmunamál o.m.fl.
• Finna leiðir til að aðstoða fólk við að gerast grænmetisætur, t.d. með því að búa til aðlögunarkerfi eða leiðbeiningar um fyrstu skrefin, með hvatningarfundum, fræðsluefni og öðrum leiðum.
• Leita leiða til að bæta og auka grænmetis- og veganmerkingar neysluvara og matseðla og athuga jafnframt forsendur þess að gerast vottunaraðili á Ísland.
• Félagið veiti athygli á því og viðurkenni það sem vel er gert sem samræmist markmiðum félagsins.

Kjörinn formaður samtakanna er Sigvaldi Ástríðarson en ásamt honum sitja í stjórn Sigurbaldur P. Frímannsson, gjaldkeri, Elísa Guðjónsdóttir, ritari, Helga María Ragnarsdóttir meðstjórnandi og formaður hagsmunagæsluhóps og Sæunn I. Marinósdóttir meðstjórnandi og formaður fræðslu- og fjölmiðlahóps.

Samtökin má finna á Facebook: https://www.facebook.com/Graenmetisaetur og þar verður tilkynnt um nýja vefsíðu samtakanna á næstu vikum.

Nánari upplýsingar veitir Sigvaldi Ástríðarson í síma 696-5444 eða á valli@graenmetisaetur.org

Úr eldhúsi Helgu Mogensen

Á síðustu þrjátíu árum hefur Helga Mogensen tekið þátt í uppbyggingu margra helstu grænmetisveitingastaða landsins og deilt reynslu sinni og þekkingu í grænmetismatargerð, landanum til ánægju og heilsubótar.

Helga Mogensen hefur nú sett á markað sælkeramat undir heitinu „Úr eldhúsi Helgu Mogensen“. Hugmyndafræði Helgu er einföld. Hún vill bjóða landsmönnum og -konum upp á hollan og hreinan sælkeramat, sem er matreiddur af ást og virðingu við neytandann. Engin geymsluefni eða önnur aukaefni.

Indverskur grænmetisréttur
Indverski grænmetisrétturinn er bragðgóður og ljúfur. Í réttinum eru rauðar linsubaunir, sem eru mjög próteinríkar, gulrætur, spínat, laukur og hvítlaukur ásamt kókósmjólk og dásamlegum indverskum kryddum. Hann er skreyttur salthnetum og með réttinum fylgja hýðishrísgrjón. Helga mælir með hnetusósunni og fersku salati með þessum. Rétturinn er borinn fram í handhægu glasi sem er endurvinnanlegt.

Indverskur lambapottréttur
Lambapottrétturinn er guðdómlegur. Það eru strákarnir í Kjöthöllinni sem sjá um að í lambrétturinn fer aðeins súper gott lambakjöt. Síðan er það laukur, gulrætur, kúrbítur og ferskir tómatar. Sósan er löguð úr kókósmjólk, maukuðu chillí ásamt girnilegum kryddum og tómatpúrru og hvítlauk. Með réttinum fylgja hýðishrísgrjónum og mangó-chutney. Toppaðu þennan með myntu-engifersósunni og þú iðar af sælu. Pottrétturinn er borinn fram í handægum endurvinnanlegum umbúðum.

Tælenskur kjúklingabaunaréttur
Rétturinn er svo einfaldur en samt svo ljúffengur.Þessi er bragðmeiri en sá indverski. Hann inniheldur kjúklingabaunir, sætar kartöflur, gulrætur, lauk, papriku og kókósmjólk, sítrónugras, karrý og önnur himnesk krydd. Með réttinum fylgja hýðishrísgrjón. Með þessum rétt er nauðsynlegt að fá sér hnetusósu eða myntu-engiferssósu. Þessi inniheldur ekki hvítlauk.

Réttirnir Úr eldhúsi Helgu Mogensen er hæt að nálgast í Frú Laugu, Melabúðinni, Fjarðarkaupum og Lifandi Markaði ásamt Sputnik versl, Vísir Laugavegi.

Helga leggur mikið upp úr samspili ólíkra hráefna sem kitla bragðlaukana og leikur sér að samsetningu og útliti til að gera matarstundina ánægjulega. Umbúðirnar þola örbylgjuofn en eins er ekkert auðveldara en að skella þeim á pönnuna og hita.

Elskum umhverfið!

Allar umbúðirnar eru endurvinnanlegar og hvetur Helga viðskiptavini sína til að flokka umbúðir eftir notkun.

Solla besti hráfæðiskokkur heims annað árið í röð

Hráfæðiskokkurinn Sólveig Eiríksdóttir, eða Solla eins og hún er kölluð, fór með sigur af hólmi í keppni hráfæðismatreiðslumanna annað árið í röð. Solla, sem var tilnefnd í tveimur flokkum, "BEST of RAW Gourmet Chef" og líka í "Best RAW Simple Chef" sigraði báða flokkana. Valið fór fram á netinu.

"TAKK ♥ TAKK ♥ TAKK allir fyrir stuðninginn!!! Þið eruð FRÁBÆR ♥ Ég vann annað árið í röð BEST of RAW i báðum flokkum*•.¸¸☼ Úhhh jéhhh ♥" skrifaði Solla á Facebooksíðuna sína þar sem hún þakkar fyrir alla hamingjuóskirnar sem vinir hennar hafa sent henni á síðunni.

Ljósmynd: Solla hráfæðisfrömuður.

Hungruð í breytingar

Samtök Lífrænna Neytenda bjóða til kvikmyndasýningar á heimildar myndinni Hungry for Change fimmtudaginn 13.desember n.k. kl 20:00 í Norræna húsinu.

Í myndinni ræða ýmsir aðilar úr heilsugeiranum um núverandi stöðu matvæla í heiminum og megrunarbransann. Í Myndinni er tekið fyrir hvernig maturinn sem við borðum getur annað hvort hjálpað okkur eða beinlínis unnið gegn okkur.

Sjá trailer úr myndinni Hungry for Change.

Aðgangur ókeypis og öllum opinn meðan húsrúm leyfir.

Matreiðslunámskeið NLFR

Matreiðslunámskeiðið „Grænt og gómsætt, hollustan í fyrirrúmi“ með Þorkeli kokki verður haldið á Heilsustofnun NLFÍ í Hveragerði næstkomandi laugardag, þann 8. september 2012.

Á námskeiðin verða matreiddir í sýnikennslu girnilegir, hollir grænmetis- og baunaréttir og gómsætur eftirréttur. Í lokin er síðan sameiginlegt borðhald.
Kennt er frá kl. 13:00 - 16:00 og kostar 4.000 kr. fyrir félagsmenn en 5.000 kr. fyrir þá sem standa utan NLFR. Þátttakendur fá jafnframt frítt í baðhús HNLFÍ.

Skráning á námskeiðið fer fram í nlfi@nlfi.is og í síma 552-8191 frá kl 10:00-12:00.

Sjá Heilsustofnun NLFÍ hér á Grænum síðum.