Náttúran.is

Ætihvannarhóstatöflur

Nú er rétti tíminn til að skera hvönn og margt gott hægt að gera úr stönglum ætihvannarinnar [Angelica archangelica]. Seinna í sumar er síðan hægt að safna fræjum, þurrka og nota í brauð. Einn af eiginleikum ætihvannarinnar er að vinna gegn öndunarerfiðleikum og hósta og því tilvalið að nota þessa frábæru jurt til að útbúa hóstastillandi hálstöflur eða dropa.

Einfalt og skemmtilegt er að gera hvannarhóstatöflurnar. Maður tekur hvannarstöngul og sker langsum, treður í glerkrukku og hellir flórsykri yfir, eins mikið og hægt er að troða í krukkuna.

Látið liggja í 2-14 daga. Hristið krukkuna af og til. Flórsykurinn sýgur vökvann smám saman úr hvannarstönglunum. Stönglarnir eru síðan teknir upp úr krukkunni, vökvinn þykktur með aðeins meiri flórsykri og látið dropa eða sprautað með kúasprautu á smjörpappír. Látið þorna í 1-2 daga. Þá eru droparnir losaðir af smjörpappírnum og settir í ílát. Geymist þannig vel allan veturinn.

Uppskrift: Dr. Christian Osika.

Myndirnar sýna hvannardropagerð. Á efstu myndinni eru stönglarnir settir í krukku og flórsykri hellt yfir, hrista verður niður í krukkunni nokkrum sinnum til að geta fyllt hana alveg. Á myndinni t.v. er verið að toga stönglana upp úr krukkunni. Myndin t.h. er af Daníel Tryggva 5 ára að sprauta hvannardropum á smjörpappír.
Ljósmyndir: Guðrún Tryggvadóttir ©Náttúran.is